پرسیار : ئایا دروستە نوێژ لە شوێنێک بکەیت سەگی لێ بێت ھاتووچۆ بکات ، یان لەوەڕگای سەگ بێت ؟
وەڵام : زانایان دەڵێن شوێنی ھاتووچۆی سەگ یان شوێنی لەوەڕگای سەگ نابێتە ڕێگر بۆ نوێژ ، وە شوێنەکە پیس ناکات و دروستە نوێژی لێ بکەیت ، بەڵگە :
(١) عن ابن عمر رضي الله عنهما قال : (( كُنْتُ أَبِيتُ فِي الْمَسْجِدِ فِي عَهْدِ رَسُولِ اللَّهِ صَلَّى اللَّهُ عَلَيْهِ وَسَلَّمَ ، وَكُنْتُ فَتًى شَابًّا عَزَبًا ، وَكَانَتْ الْكِلَابُ تَبُولُ وَتُقْبِلُ وَتُدْبِرُ فِي الْمَسْجِدِ ، فَلَمْ يَكُونُوا يَرُشُّونَ شَيْئًا مِنْ ذَلِكَ )) رواە البخاری (١٦٨) .
(٢) نقل نەکراوە ھاوەڵان و پێشینەکان خۆیان بەدوور گرتبێ بۆ نوێژ کردن لەو شوێنەی سەگ پێیدا تێپەڕ بووبێت .
بەڵام سەبارەت بە میز و پیسایی سەگ زانایان دەڵێن :
(١) لەوانەیە میز و پیسایی لەناو مزگەوت نەکردبێ ، بەڵکو تەنھا ھاتوو چۆی ھەبووە میزی لەدەرەوەی مزگەوت کردووە .
(٢) ھەندێک زانای تر دەڵێن ئەمە پێش حوکم دان بووە بە پیسی سەگ و واجبی خۆ پاککردنەوە لێی .
ابن حجر ڕەحمەتی خوای لێ بێت دەفەرمووێت : (( نزیکتر ئەوەیە بوترێ : ئەمە سەرەتا بووە و ئەصل وابوو کە دروستە و پاکە ، پاشان فەرمان کرا بە ڕێز گرتن لە مزگەوت و پاککردنەوەی و دەرگاش بۆ مزگەوت دانرا . )) فتح الباری ج١ لاپەڕە ٢٧٩ .
زانایان دەڵێن ئەگەر شوێنی نوێژ کردن میز یان پیسایی سەگی لێ بێت نابێت لەو شوێنە نوێژ بکەیت چونکە پیسە ، وە یەکێک لە مەرجەکانی نوێژ ئەوەیە دەبێت شوێنەکە پاک بێت .
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
Www.ferdaws.net