دەقی وەڵام:

وەڵام : زانایان دەڵێن سونەت بانگ بدرێت بە دەست نوێژەوە ، کە ئەمە وتەی ھەر چوار مەزھەبەکانە .

العینی ڕەحمەتی خوای لێ بێت دەفەرمووێت : (( دەبێت بانگدەر بانگ بدات و قامەت بکات بە دەست نوێژەوە ، چونکە بانگدان و قامەت کردن زیکری شەریفن ، سونەت بە دەست نوێژ بیت ، ئەگەر بانگ بدات بێ دەست نوێژ دروستە ، ئەمە وتەی شافعی عامەی ئەھلی عیلمە . )) (البناية (١٠٩/٢) .

سەبارەت بە فەرموودەی ئەبو ھوڕیڕە :

عن أبي هريرة رضي الله عنه أن النبي صلى الله عليه وسلم قال : (( لا يؤذن إلا متوضيء )) رواه الترمذي (٢٠٠) .

عبداللە بن عبدالرحمان ال بسام خوا بیپارێزێت دەفەرمووێت : (( ظاهری فەرموودەکە وا دیارە دەست نوێژ مەرجە بۆ بانگ ، بەڵام زۆربەی زانایان دەڵێن سونەتە نەک واجبە . )) توضیح الأحکام ج١ لاپەڕە ٤١٦ .

زانایان دوو وتەیان ھەیە لەسەر فەرموودەکە :

(١) فەرموودەکە لاوازە .

(٢) ئەگەر فەرموودەکە صحیحیش بێت مەبەستی ئەوەیە باشتر وایە بە دەست نوێژەوە بانگ بدەیت نەک واجب بێت .

ابن عثیمین ڕەحمەتی خوای لێ بێت دەفەرمووێت : (( بەڵام فەرموودەکە لاوازە ، ھەروەک دانەری کتاب دەڵێت لاوازە لای ترمذي ڕەحمەتی خوای لێ بێت ، ئەگەر فەرموودەکە صحیحیش بێت لە بابی باشترینە نەک لە بابی واجب بێت ، بەڵگە لەسەر ئەمە عموماتی سونەت ، لەوانە وتەی عائیشە خوا لێی ڕازی بێت : " کان رسول اللە صلی اللە علیە وسلم یذكر الله على كل أحيانه " ، بانگدان زیکرە ، دروستە بانگ بدەیت ئەگەر دەست نوێژیشت نەبێت ، بەڵام باشتر وایە بە دەست نوێژ بیت ، چونکە زیکرە ، زیکر دەبێت مرۆڤ بە دەست نوێژ بێت . )) فتح ذي الجلال والإكرام ج۲ لاپەڕە ٢٢٧-٢٢٨ .

——————————————————————————————

Www.ferdaws.net