دەقی وەڵام:

وەڵام: خوای گەورە دەفەرمووێت: (وَمَنْ يَرْتَدِدْ مِنْكُمْ عَنْ دِينِهِ فَيَمُتْ وَهُوَ كَافِرٌ فَأُولَئِكَ حَبِطَتْ أَعْمَالُهُمْ فِي الدُّنْيَا وَالْآخِرَة).

واتە: هه‌ر که‌س له ئێوه پاشگه‌ز بێته‌وه له ئاینه‌که‌ی و به کافریش بمرێت، ئا ئه‌و جۆره که‌سانه کاره‌کانیان پووچه‌ڵ ده‌بێت له دنیاو قیامه‌تدا.

هەر کەسێک پاشگەز بێتەوە لە دینی خۆی پاشان تەوبە بکات لێی وەردەگیرێت، ئەو کردەوەیەی ئەنجامی داوە پێش هەڵگەڕانەوە لە دین پوچ نابێت، لەبەر مفهومی وتەی: ﴿فَيَمُتْ وَهُوَ كَافِرٌ﴾، پێچەوانەی وتەی ئەوانەی دەڵێن کردەوەی پوچ دەبێت ئەوەی پێش هەڵگەڕانەوە ئەنجامی داوە.

ئیمام شافعی بۆ ئەوە چووە کردەوە پوچ دەبێتەوە ئەگەر لەسەر کوفر بمرێت، کە ظاهری ئایەتەکە بەڵگەیە لەسەر ئەمە، ئیمام مالک و ئەبو حەنیفە بۆ ئەوە چوون کردەوە پوچ دەبێتەوە بە هەڵگەڕانەوە ئەگەر لەسەریشی نەمرێت، واتە ئەگەر پەشیمان بێتەوە و موسڵمان بێتەوە هەر کردەوەی پوچ بووە، چونکە شەریکی بۆ خوا بڕیاداوە، شیرکیش کردەوە پوچ دەکات.

بەروبوومی جیاوازیەکە لە حەجدا، لەسەر وتەی یەکەم ئەگەر کەسێک حەجی کردبێت پاشان پاشگەز بێتەوە و پاشان موسڵمان بێتەوە، ئەوە حەجی واجبی ئیسلامی لەسەر لاچووە و پوچ نەبۆتەوە، لەسەر وتەی ئەبو حەنیفە و مالک حەجی پوچ بۆتەوە و واجبە لەسەری حەجێکی تر بکاتەوە، وتەی ڕاست وتەی ئیمام شافعی یە، واللە أعلم.