دەقی وەڵام:

وەڵام: زانایان سەبارەت بە دابەزینی خوای گەورە بۆ ئاسمانەکان دەڵێن: ـ فەرموودە بە متواتری هاتوون کە خوای گەورە دێتە ئاسمانەکانی دونیا لە سێیەکی کۆتایی شەودا. ـ ئەم دابەزینە وەک هی دروستکراوەکان نییە، خوای گەورە وەک هیچ دروستکراوێک نییە لە ناو و سیفەتدا، بۆیە زۆر ئاساییە خوای گەورە دابەزێتە ئاسمانەکان و لە هەمان کاتدا لەسەر عەرشیش بێت، خوای گەورە لەسەرووی هەموو دروستکراوەکانە نەک درووستکراوەکان لەسەری خوای گەورە بن.

ـ نابێت هەرگیز وا گومان ببەیت کاتی دابەزین عەرش چۆل بووە و ئاسمانەکانیش دەورەی خوای گەورەی داوە، خوای گەورە هەرگیز لەناو دروستکراوەکانیدا نییە و هیچ دروستکراوێک دەورەی نەداوە، خۆی گەورەیە و لەسەرووی هەمووانەوەیە.

ـ وتەی: ﴿أَأَمِنْتُمْ مَنْ فِي السَّمَاءِ﴾، ئەمە نابێتە بەڵگە کە خوای گەورە لەناو ئاسمانەکانە، لەبەر ئەوەی پیتی (في) بەمانای لەناودابوون هەڵدەگرێت، چونکە ناکرێت خوای گەورە لەناو دروستکراوەکانی خۆیدا بێت و دروستکراوەکانی دەورەی خوایان دابێت، سەبارەت بەم ئایەتە دەڵێن:

- یان: (السماء) بە مانای (العلو) بەرزی هەڵدەگرێت.

- یان پیتی (في) بەمانای (علی) لەسەربوون هەڵدەگرێت، کە لە زمانی عەرەبیدا پیتی (في) مانای (علی) دێت، هەروەک خوای گەورە دەفەرمووێت: ﴿وَلَأُصَلِّبَنَّكُمۡ فِي جُذُوعِ ٱلنَّخۡلِ﴾ [طه: 71]، واتە: (على جذوع النخل)، لەسەر ئەمە (في السماء)، واتە: (علی السماء)، واتە: لەسەر ئاسمانە). (مجموع فتاوى ورسائل العثيمين) (8/337).

- یانیش مانای ئایەتەکە ئەوەیە (لە ئاسمانە) نەک (لەناو ئاسمان).

ابن تیمیة ڕەحمەتی خوای لێ بێت دەفەرمووێت: (هەر کەسێک گومان ببات خوای گەورە لە ناو ئاسمانەکانە ئەوە کەسێکی نەزانە بە یەک دەنگی زانایان). (التدمرية) لاپەڕە (85، 86).