پرسیار: ئایا شیرکی بچووک گەورەترە یان تاوانی گەورە؟ ئایا کوشتن و زینا گەورەترە یان شیرکی بچووک؟
وەڵام: جیاوازی هەیە لەنێوان زانایان سەبارەت بە شیرکی بچووک ئایا خوای گەورە لێی خۆش دەبێت یان دەبێت لەسەری سزا بدرێت، دوو وتە هەیە:
١ـ هەندێک زانا بۆ ئەوە چوون لێخۆش بوون بۆی نییە، لەسەری سزا دەدرێت و دواتر لە دۆزەخ دەردەهێنرێت.
٢ـ هەندێک زانای تر بۆ ئەوە چوون خوای گەورە ویستی لێ بێت لێی خۆش دەبێت سزای نادات، ویستیشی لێ بێت سزای دەدات، کەواتە هەردوو لا یەک دەنگن لە دۆزەخ هەتا هەتایی نابێت.
لەسەر وتەی یەکەم هەندێک زانا بۆ ئەوە چوون شیرکی بچووک گەورەترە لە تاوانی گەورە، چونکە شیرکی بچووک خوای گەورە لێی خۆش نابێت هەر سزای دەدات، بەڵام تاوانی گەورە لەژێر ویستی خوای گەورەیە یان لێی خۆش دەبێت یان سزای دەدات.
وتەی ڕاست زانایان دەڵێن جنسی شیرکی بچووک ترسناکترە لە تاوانی گەورە، بەشێوەیەکی بڕاوە ناتوانین بڵێین شیرکی بچووک گەورەترە لە هەموو تاوانە گەورەکان، کوشتن و زینا گەورەترن لە شیرکی بچووک، واللە اعلم.