پرسیار: حوکمی زەکات دان بە نزیکەکان ئەوانەی واجبە مەسرەفیان بکەیت بەڵام ناتوانی مەسرەفیان بکەیت؟
وەڵام: زانایان دەڵێن دروستە زەکات بدەیت بەوانەی مەسرەفیان لەسەر تۆیە ئەگەر نەتوانی مەسرەفیان بکەیت، کە ئەمە وتەی حەنابلە و ابن تیمیە و ابن عثیمینە، چونکە:
١ـ دەقەکان لە کتاب و سوننەت کەسی دوور و نزیک دەگرێتەوە بۆ زەکات پێدانیان، بەڵکو زەکات دان بە نزیکەکان گەیاندنی پەیوەندی خزمایەتیشی تێدایە، هەروەک پێغەمبەری خوا دەفەرمووێت: (إنَّ الصَّدقةَ على المسكينِ صَدقةٌ، وعلى ذي الرَّحِمِ اثنتان: صَدَقةٌ وصِلةٌ)، خێر دان بە نزیکەکان خێرترە لە کەسانی تر.(جامع المسائل) لابن تيمية (٦/٣٧١).
٢ـ ئەگەر زەکات بدرێت بە ئیمام، ئیمامیش بە نزیکەکانی خۆی بدات دروستە، یان تەسلیمی کەسێک بکرێت ئەویش بە نزیکەکانی بدات ئەمەیان دروستە، کەواتە ئەمەش بەهەمان شێوەیە دروستە زەکات بە نزیکەکانی خۆی بدات. (جامع المسائل) لابن تيمية (٦/٣٧٤).
٣ـ کەس نزیک لەپێشترە لە کەسی دوور بۆ زەکات و جێ بەجێ کردنی حاجەتیان. (جامع المسائل) لابن تيمية (٦/٣٧١).