پرسیار: کەسێک (٥٠) دەفتەری داوە بە کەسێک بۆ بازرگانی، واتە کەسێک پارەی ئامادەکردووە و کەسێکی تریش ئیش بەو پارەیە دەکات، لەسەر ئەوەش ڕێککەوتوون قازانج بەنیوەیی بێت، گریمان قازانج (١٠) دەفتەر بوو، ئایا زەکاتی سالانەی چۆن دەدرێت؟
وەڵام: زانایان دەڵێن ئەم بابەتە پێی دەڵێن: (قراض) یان (مضاربة): کەسێک پارە دادەنێت و کەسێکی تر ئیش بەو پارەیە دەکات، قازانجیش بەگوێرەی ڕێککەوتنیان،
زانایان دەڵێن خاوەنی سەرمایە زەکاتی سەرمایەی خۆی دەدات و زەکاتی قازانجی خۆیش دەدات، واتە زەکاتی (٥٠) دەفتەر دەدات و زەکاتی (٥) دەفتەرەکەش دەدات کە قانجە و نیوە کراوە.
سەبارەت بەو (٥) دەفتەرەی قازانجە بۆ ئەو کەسەیە کە ئیشی بە سەرمایەکە کردووە ئەو زەکات نادات تا پارەکە وەردەگرێت و حسابات دەکرێت، چونکە نەبۆتە خاوەنی (٥) دەفتەر تا حساب دەکرێت و وەردەگرێت، هەروەها ئەگەری لەناو چوون و خەسارەی هەیە، لە دوای قازانج وەرگرتنیش دەبێت ساڵێکی بەسەردا تێپەڕێت و لە حەدی نیساب نەهێتە خوارەوە.
ئەو کەسەی ئیش بە سەرمایەی خەڵک دەکات لەسەری نییە زەکاتی سەرمایەکەی خەڵک بدات، بەڵکو تەنها زەکاتی قازانجی خۆی دەدات دوای وەرگرتن، پاشان دەبێ ساڵی بەسەردا بسوڕێتەوە. (المغني) لابن قدامە (٤/١٦٠)، (الشرح الممتع) لابن عثیمین (٦/١٧).