پرسیار: من شەو نیەتی ڕۆژووم هەبوو بۆ بەیانی، بەیانیش کە هەستام بانگی دابوو و بیرم نەبوو کە بە ڕۆژوو دەبم و بنێشتم خوارد، ئایا ئێستا ڕۆژووم بۆ هەیە؟
وەڵام: زانایان سەبارەت بە نییەت دەڵێن:
١ـ رۆژووی واجب مەرجە نییەت بهێنی پێش فەجر، دروست نییە لە رۆژدا دوای فەجر نییەت بهێنی بۆ ڕۆژووی واجب.
٢ـ رۆژووی سوننەت جا رۆژووی (مطلق) بێت یان رۆژووی (معین) بێت دروستە لە رۆژدا نییەت بهێنی، بەلام نابێت لە دوای بانگی بەیانی یەوە هیچ شتێکی خواردبێت و ئەوشتانەت نەكردبێت كە رۆژوو دەشكێنێت.
٣ـ باشتر وایە كاتێک لە ڕۆژدا نیەتی بە رۆژوو بوون دەهێنی پێش نیوەڕۆ بهێنی، چونکە هەندێک هاوەڵان و زانایان دەڵێن دوای نیوەڕۆ نابێت.
٤ـ ئەوەی لە ڕۆژدا نییەت دەهێنێت پاداشتی وەك ئەو كەسە نییە كە لە پێش فەجر نییەتی هێناوە ئەگەر چی بڵێی پاداشتی رۆژی تەواویشی بۆی هەیە.
٥ـ زانایان دەڵێن بنیشت دوو جۆرە:
یەکەم: بنیشت هەیە دەتاوێتەوە، ئەمەیان ئەگەر لە گەروو بچێتە خوارەوە ڕۆژوو دەشکێنێت.
دووەم: بنیشت هەیە ناتاوێتەوە، ئەگەر تامی هەبوو گەیشتە گەروو زانایان دوو وتەیان هەیە:
ـ هەندێک بۆ ئەوە چوون ڕۆژوو دەشکێنێت.
ـ هەندێک زانای تر بۆ ئەوە چوون ڕۆژوو ناشکێنێت.
ئەگەر بڵێی ڕۆژوو دەشکێت ئەوە ئەم وتەیە وتەیەکی بەهێزە، چونکە تامیش بەشێکە لە بنیشت، واللە أعلم.
تەنها بە تام کردنی بنیشت بێ ئەوەی قووت بدات ڕۆژوو ناشکێت، بەڵام دەبێت موسلمانان ئاگادار بێت بنیشت لکاو دروست دەکات و تامی هەیە نابێت قووت بدات، دەبێت ئاو لەدەم ڕابدات بۆ ئەوەی هیچ تام داخلی قورگی نەبێت.
صالح الفوزان خوا بیپارێزێت دەفەرمووێت: (بنیشت مەکروهە بۆ ڕۆژووگر، بنیشت دوو جۆرە: بنیشت هەیە دەتاوێتەوە و لێک جیادەبێتەوە لەناو دەم دا، ئەمەیان دروست نییە چونکە دەگات بە گەروو ڕۆژوو بەتال دەکاتەوە، سەبارەت بە بنیشتی بەهێز ئەوەی ناتاوێتەوە و لێک جیانابێتەوە لەناو دەم دا، ئەمەیان مەکروهە بۆ ڕۆژووگر).