پرسیار: ئایا خوێن لە لاشە دەرهێنان ڕۆژوو دەشکێنێت؟
وەڵام: زانایان سەبارەت بەمە دەڵێن:
١- دروستە ڕۆژووگر حیجامە بکات و حیجامە ڕۆژوو ناشکێنێت، لەبەر ئەوەی پێغەمبەری خوا (ﷺ) حیجامەی کردووە و بەڕۆژوو بووە، کە ئەمە وتەی زۆربەی زانایانە، وتەی ئەبو حەنیفە و مالک و شافعی و بوخاری و ابن حزمە، سەرەتا نەهی کرابوو لە حیجامە و ڕۆژووی دەشکاند، بەڵام دواتر ئەم حوکمە نەسخ بۆتەوە.
٢- سەبارەت بە خوێن وەرگرتن بۆ شیکاری پزیشکی یان خوێن بەخشین بە کەسێکی تر جیاوازییەکە بۆ حیجامە دەگەڕێتەوە، ئەوانەی دەڵێن حیجامە ڕۆژوو دەشکێنێت دەڵێن خوێن وەرگرتن ڕۆژوو دەشکێنێت ئەگەر خوێنەکە زۆر بوو و کاریگەری لەسەر کەسەکە هەبوو، ئەگەر کەم بوو و کاریگەری لەسەری نەبوو ناشکێنێت، لەسەر وتەی زۆربەی زانایانیش ڕۆژوو ناشکێت جا خوێنەکە زۆر بێت یان کەم بێت.
٣- سەبارەت بە دەرچوونی خوێن لە ددان یان برین یان هەر ئەندامێکی لاشە ڕۆژوو ناشکێنێت، جا خوێنەکە زۆر بێت یان کەم بێت.