پرسیار: ئایا گوناحە خۆم هاوڕێکانم بە کۆمەڵ جاری وا هەیە بۆ گاڵتە ئەڵێین ئەچین مەشروب ئەخۆین یان زینا ئەکەین یان هەر کارێکی تری گوناح، تەنها بۆخۆشی وا ئەڵێین و خۆشمان ئەزانین ئەو کارانە هەمووی گوناحن و شتی وا قەت ئەنجام نادەین گاڵتەی جوێن و شتمان نیە هەر بۆ خۆشی ئەوەی ئێستا وتم ئەیڵێین گوناحە؟
وەڵام: زانایان سەبارەت بەمە دەڵێن:
١- خوای گەورە لە قورئانی پیرۆزدا زینای ناو ناوە بە فاحیشە بەڵام شیرکی ناو نەناوە بە فاحیشە کەچی شیرک گەورەتریشە، ئەمەش بەڵگەیە لەسەر پیسی و قێزەونی زینا، تاوانێک ئەوەندە قێزەون بێت چۆن دەبێت ببێتە قسە و باس و گاڵتە و مەجلسی موسڵمان.
٢- لە تەواوی ئیمان ئەوەیە تاوان بە شتێکی قیزەون دابنێیت و ڕقت لێ بێتەوە و بەگەورە دابنێیت، نەک تاوانی گەورە بە بچووک ببینیت و بکرێتە قسە و باس و گاڵتە.
٣- فاحیشە ئەگەر ڕوویدابێت نابێت لەنێو خۆتان یان لەناو کۆمەڵگا باس بکەن، چونکە دەبێتە هۆی ئەوە تاوان ببێتە شتێکی ئاسایی و هەیبەتی نەمێنێت، خەڵک زیاتر تووشی فاحیشە دەبێت و جورئەتی دەبێت.
٤- ئیماندار زمانی پیس نییە بە قسەی ناشیرین و قیزەون، مرۆڤ دەبێت ئاگادار بێت قسە هەیە مرۆڤ دەیکات و بە شتێکی کەم و ئاسایی دەبینێت، کەچی چەندین پایز لەناو ئاگردا دەمێنێتەوە بەهۆی ئەم قسەیەوە.