پرسیار: دەکرێت بە پوختی باسی مەرجەکانی کڕین و فرۆشتن بکەن؟
وەڵام: زانایان دەڵێن نوێژ چۆن مەرجی هەیە بۆ دروستی نوێژ، کڕین و فرۆشتنیش ئاوا مەرجی هەیە بۆ دروستی کڕین و فرۆشتنەکە، ئەم مەرجانە زانایان دەریان هێناون لە دەقە شەرعییەکان، بە پوختی ئەم چەند مەرجەیان داناوە:
١- ڕازی بوونی هەردوو لا، دروست نییە بە ناچاری و ناحەق گرێبەست ئەنجام بدرێت، عبد الرحمن بن ناصر السعدي دەفەرمووێت: ڕازی بوون جێگیربووە بە ئەسلی کتاب و سوننەت و ئیجماع، ئەمە لە داواکردنی دادپەروەری و ئینصافە.
٢- کەسەکە شایستەی ئەوە بێت گرێبەست بکات، واتە: ژیر بێت و توانای تەسەڕوف کردنی هەبێت لە مالدا.
٣- دەبێت ئەو شتەی گرێبەستی لەسەر دەکرێت بەسوود بێت یان ڕێگەپێدراو بێت.
٤- ئەوەی گرێبەست دەکات خاوەنی ئەو شتە بێت کە گرێبەستی لەسەر دەکرێت، یان ئیزنی پێ درابێت بۆ گرێبەست کردن.
٥- ئەو شتەی گرێبەستی لەسەر کراوە توانای تەسلیم کردنی هەبێت.
٦- ئەو شتەی دەفرۆشرێت و نرخەکەی زانراو بن بۆ کڕیار و فرۆشیار، شتی نادیار دروست نییە.
سەبارەت بە نەهی کردن لە کڕین و فرۆشتن بۆ سێ شت دەگەڕێتەوە: (الجهالة)، شتی نادیار، (الغرر)، فێل کردن، (الربا) بە هەموو جۆرەکانیەوە. (توضیح الأحکام) (٣/١٦٢).