پرسیار: هەموو فرۆشتنێک جەهالەتی تێدابێ (غرر) حەرامە جا زۆر بێت یان کەم؟
وەڵام: مەبەست لە (غرر) ئەوەیە زۆر بێت تا وەسف بکرێت بە (غرر)، ئەگەر نادیاریەکە کەم بێت یان جەهالەت کەم بێت هیچی تێدانییە، چونکە کەم شت هەیە جەهالەتێکی کەمی نەبێت، نموونە: فرۆشتنی خانوو کڕیار نەی بینیوە خانووەکە چۆن دروست کردووە و بەچی دروستکردووە، یان ئوتومبێل یان ئاژەڵ نازانیت بە ووردی چەند کیلۆ شیر دەدات ڕۆژانە، جیاوازییەکە بۆ تەقدیری کردنی زانایان دەگەڕێتەوە کە چەند داخلی (غرر)ی زۆر دەبێت و چەندیش داخلی (غرر)ی کەم دەبێت.
کەواتە (غرر) دوو جۆرە:
یەکەم: (غرر)ێکی زۆر، ئەمەیان هەر چوار مەزهەبەکان یەک دەنگن لەسەری حەرامە، هەندێک زانا ئیجماع نەقل دەکەن حەرامە. (الإستذکار) (٧/٤٠٩)، (مجموع) (٩/٢٥٨).
دووەم: (غرر)ێکی کەم، ئەمەیان هەموو زانایان یەک دەنگن لەسەری کە دروستە و حەرام نییە. (مجموع) (٩/٢٥٨).