پرسیار: دەکرێت ڕوونکردنەوەیەک بدەن سەبارەت بە ئافرەتی دووگیان و شیردەر بۆ ڕۆژووی ڕەمەزان؟
وەڵام: زانایان سەبارەت بەمە دەڵێن:
١ـ حوکمی ڕۆژوو بۆ دووگیان و شیردەر: دروستە بۆیان ڕۆژوو بشکێنن لە مانگی ڕەمەزاندا، جا لەبەر ترسی نەفسی خۆی یان مناڵەکەی، کە ئەمە وتەی هەر چوار مەزهەبەکانە.
٢ـ ئەگەر دووگیان و شیردەر ڕۆژوویان شکاند لە ترسی نەفسی خۆیان: تەنها لەسەریان ڕۆژوو قەزا بکەنەوە، کە ئەمە وتەی حەنەفی یەکان و شافعی یەکان و حەنابلەیە.
٣ـ ئەگەر دووگیان و شیردەر ڕۆژوویان شکاند لەترسی مناڵەکەیان: قەزاکردنەوەی لەسەرە و فیدیەی لەسەر نییە، کە وتەی حەنەفی یەکان و هەندێک پێشینەکان و ابن منذر و ابن باز و ابن عثیمینە.
ئەگەر نەتوانێ قەزا بکاتەوە لەبەر دووبارە بوونەوەی مناڵ بوون و شیردان، دەتوانێ فیدیە بدات لەسەر وتەی هەندێک زانا.