دەقی وەڵام:

وەلام // سەرەتا دەبێ پرسیاری ئەوە بکرێ ئایا خوای گەورە خۆی ڕوحی هەیە یان روح سیفەتی خوای گەورەیە ، ئینجا بلێیت ئایا روحی ئادەم بەشێکە لە ڕووحی خوای گەورە ، زانایان دەلێن وەسفی خوای گەورە ناکەین ئیلا خوای گەورە خۆی وەسفی خۆی کردبێت یان پێغەمبەر سەلامی خوای لێ بێت باسی کردبێت ، هیچ بەلگە نەهاتوون روح سیفەتی خوای گەورە بێت ، بەلکو ڕووح دروست کراوێکە لە دروست کراوەکانی خوای گەورە ، وە خوای گەورە ڕوحی دروست کراوی داوەتە پال خۆی وەکو مولک و ڕێز کە ڕوح مولکی ئەوە و بەویستی خۆی دەکاتە بەر دروست کراو وە بەویستی خۆی دەردێنێت نەک ڕووح بەشێک بێت لە خوا و سیفەتی بێت .

زانایان دەلێن : (( ونفخت فیە من روحی....)) لێرە خوای گەورە روحی ئادەمی داوەتە پاڵ خۆی ، وەک مولک و ڕێز و گرینگی روح ، هەروەک چۆن وشتری داوەتە پاڵ خۆی (( .....ناقة الله .....))سورەت الشمس ئایەتی ۱۳واتە : وشتری خوای گەورە ، هەموومان دەزانین هەموو وشترەکان هی خوان بەلام لێرە ئەم وشترەی داوەتە پال خۆی وە تەشریف.

سەبارەت بە عیسی بەهەمان شێوە ئایەتی ۱۷۱ سورەت النساء: (( .......و روح منە )) گاورەکان بەمە گومرا بوون ، دەلێن ( من ) لێرە للتبعیض دێت ، واتە بە مانای هەندێک و بەشێک دێت ، واتە ڕوحی عیسی بەشێکە لە هی خوای گەورە ، وە هەندێک کەسیش خۆیان بە موسلمان دادەنێن دەلێن هی ئادەمیش بەهەمان شێوە ، کە ئەمە کوفری گەورەیە و لە دین دەرچووە ، زانایان دەلێن ڕاستی ئەوەیە (من ) لابتداء الغایة ، واتە ئەم روحە لەلایەن خوای گەورەیە سەرەتا و دروست کردن و بەبەرداکردن ، هەر خۆی خاوەنیەتی و بەڕێوەی دەبات ، وەک ئایەتی ۱۳ لە سورەت الجاثیة : (( و سخر لکم ما فی السماوات و ما فی الارض جمیعا منه )) واتە : هەر چی لە ئاسمان و زەوی دایە خوای گەورە بۆ ئێوەی مسخر کردووە ، لەم ئایەتە ( من ) للابتداء ، نەک للتبعیض ، چونکە کەس نەی وتووە ڕۆژوو مانگ ۆ ڕووبار بەشێکن لە خوای گەورە.

ابن عثیمین ڕەحمەتی خوای لێ بێت دەلێت : (( ڕوحی ئادەم دروست کراوە خوای گەورە دروستی کردووە ، بەلام داویەتە پاڵ خۆی وەک ڕێز ، ڕوح سیفەتی خوای گەورە نییە و بەلکو دروست کراوێکە لە دروست کراوەکانی خوای گەورە .....))

ـــــــــــــــــــــــــــــــــــــــــــــــــــــــــــــــــــــــــــــــــ