پرسیار // ئایا دروستە کەسێک قەرز لە من دەکات بە دۆلار یان کاڵایەک لێم دەکڕێت بە قەرز ، من بۆی بشکێنمەوە بەدینار لەو ڕۆژەی قەرز دەکات تاکو ڕۆژی قەرز دانەوە بەدینار قەرزەکەم بداتەوە ؟
وەلام // زانایان دەڵێن ئەسڵ وایە کە مرۆڤ کاڵایەک دەکڕێت بە قەرز بە دراوێک بە ھەمان دراو قەرزەکەی بداتەوە ، بەلام ئەگەر ھەردوولا ڕازی بن کە دراوێکی تر لە شوێنی قەرز بدرێتەوە ، ئەمەیان ھیچی تێدا نییە و دروستە بەلام بە مەرجێک دەبێت بە نرخی ئەو ڕۆژەی قەرز دەدرێتەوە بشکێندرێتەوە نەک بە نرخی ئەو ڕۆژەی قەرز کراوە .
زانایان دەلێن قەرز کردن و وەرگرتنەوە بە پارەی تر ئەم سێ حالەتانەن :
حالەتی یەکەم // سەرەتای عەقدی قەرز ھەردوو لا ڕێک دەکەون کە پارەی تر بدرێتەوە لە شوێنی قەرز بە نرخی ئەو ڕۆژەی کە قەرزی کردووە ، ئەمەیان حەڕامە و ڕیبایە .
نموونە : کەسێک موبایلێک دەکڕێت بە قەرز بە ٤٠٠$ ، سەرەتای كڕینی موبایل ھەردوو لا ڕێک دەکەون لەسەر ئەوەی کە ٥٠٠٠٠٠ دینار بدرێت ئەگەر کاتی قەرز دانەوە ھات ، چونکە ئەو ڕۆژەی موبایلی کڕی بە قەرز نرخی دۆلار بە ١٢٥٠٠٠ دینار بوو ، ئەمەیان حەڕامە .
حالەتی دووەم // سەرەتای عەقدی قەرز ھەردوو لا ڕێک ناکەون کە پارەی تر لە شوێنی قەرز بدرێتەوە ، بەلکو کاتی قەرز دانەوە ڕێک دەکەون لەسەر پارەی تر کە بدرێتەوە لە جیاتی قەرز بەلام بە نرخی ئەو ڕۆژەی کە قەرزی کردووە ، ئەمەیان حەڕامە .
نموونە : کەسێک موبایلێک دەکڕێت بە قەرز بە ٤٠٠$ ، سەرەتای عەقدی قەرز ڕێک ناکەون کە پارە بدرێتەوە لە شوێنی دۆلار بە نرخی ئەو ڕۆژەی کە قەرز کراوە ، بەلکو کاتی قەرز دانەوە ھەردوولا ڕێک دەکەون لەسەر ئەوەی ٥٠٠٠٠٠ دینار بدرێتەوە لە شوێنی قەرز چونکە ئەو ڕۆژەی موبایل بە قەرز کڕدراوە نرخی دۆلار بە ١٢٥٠٠٠ دینار بوو ، کەچی ڕۆژی قەرز دانەوە نرخی دۆلار بە ١٢٠٠٠٠ دینارە ، ئەمەیان حەڕامە .
حالەتی سێیەم // سەرەتای عەقدی قەرز ھەردوولا ڕێک دەکەون کە پارەی تر لە شوێنی قەرز بدرێتەوە و بە نرخی ئەو ڕۆژەی کە قەرز دەدرێتەوە " واتە بە نرخی ڕۆژ " بەلام کە کاتی قەرز دانەوە ھات ھەموو پارەی پێ نادات ، ئەمەیان حەڕامە .
کەسێک موبایلێک دەکڕیت بە قەرز بە ٤٠٠$ ، ڕۆژی قەرز دانەوە دیناری پێ دەداتەوە لەجیاتی دۆلار وە بە نرخی ڕۆژ کە دۆلار بە ١٢٠٠٠٠ دینارە ئەو ڕۆژە ، بەلام ھەمووی ناداتەوە کە ٤٨٠٠٠٠ دینار دەکات ، قەرزار ٣٠٠٠٠٠ دیناری پێ دەدات ، ئەوەی تر دەمێنێتەوە کە ١٨٠٠٠٠ دینارە ، ئەمەیان حەڕامە .